تبادل
لینک هوشمند
ربع بنين انطيتك سالم ترد ياريتك
عالدرب مشبوحه العين انتظر جيتك ياحسين
سالم ترد ياريتك اربع بنين انطيتك
من يوم شد لرحيله بالظعن سار الحادي
لليوم ماعندي خبر منك ياروح الهادي
عيني اعلى دربك شابحه كل ساعه اهيم بوادي
اصرخ ردت سالم ترد مايهم تروح اولادي
طول العمر باريتك اتفارقني ماظنيتك
شيداوي قلبي المجروح يالخذت وياك الروح
سالم ترد ياريتك اربع بنين انطيتك
يالي عشت مابين الجفن والقلب بيك اتولع
لا انا عقبك صابره ولا انا اجري المدمع
وانذرت ياوليدي نذر لو خبر منك اسمع
ازرع طريق الطف ورد لو شفت ظعنك يرجع
ترجع الي تمنياك واعلى الدرب تانيتك
اولادي راحت وياك بس انته يصعب فرقاك
سالم ترد ياريتك اربع بنين انطيتك
من طوح الحادي ومشى اجري الدمع خلاني
ما ادري ياحسين شاسبب منك خبر ماجاني
انطيتك اعد مافي العمر وارخصت لك شباني
دون البنين الاربعه بس اسمك اعلى لساني
مالحظه يمي انسيتك واعلى افكر خليتك
مهمومه واحسب ايام واعليا كل يوم بعام
سالم ترد ياريتك اربع بنين انطيتك
صرت احساب ايام السفر واعلى الجمر انتظرك
وياك البنين الاربعه نذرت عمرها لعمرك
كل ولد من عندهم ضلع وانته القلب اعتبرك
هاي الضلوع اتحافظك لو يوم خانك دهرك
بهالأربعه حاميتك وبكل امر واسيتك
انت الامل من دنياي يامن غبت عن عيناي
سالم ترد ياريتك اربع بنين انطيتك
اتكاثرت حسبات الفكر حمل الصبر اتعبني
ساعه اقولن بالظعن ترجع واشوفك يابني
ساعه تمرحسفة حزن تهضمني وتعذبني
وانا اعلى هالحاله صرت كل ساعه حسبه تذبني
ابلهفة قلب ربيتك ويا الأربعه ساويتك
يالي رحت عني وماجيت شلت إيدي للرب وادعيت
سالم ترد ياريتك اربع بنين انطيتك
تنطفي وتسعر بالجبد جمرة مصابي وهضمي
وهاي العليله فاطمه بالدار ظلت يمي
تشاركني لوعة فرقتك همها يشابه همي
صاحت يا هل رحت بسفر عفت اللهيب بجسمي
وانا بصبر تانيتك بعت العمر واشريتك
تقابلنا والدمعه تسيح كل وحده من عندنا تصيح
سالم ترد ياريتك اربع بنين انطيتك
يالعفت هالطفله ورحت من هو اليرد لهفتها
احتاريت انوح لمحنتي لو انحب لمحنتها
ياحسين ابد ماتختلف عن حالتي حالتها
صاحت الطفله ونادتك هاك اسمع لصيحتها
يابويا موحش بيتك اتطول السفر مادريتك
اخلفك فوق بهالحال والقلب ناداك وقال
سالم ترد ياريتك اربع بنين انطيتك
نظرات شما عزیزان:
